北京拉麵店

營業中

休息中

西九龍中心呢間北京拉麵店平時都冇乜同事會幫襯，搞到個感覺好似伏味甚濃咁，但最近發現網上外賣平台外賣自取有四折，折咗之後真係平過食頹飯，所以今日決定一戰！生煎鍋貼折實價$15.6，價錢非常合理，皮不算薄，但個餡係好食嘅，可以推介！我哋仲好豪咁叫咗個小食拼盤，總共有五款小食，包括五香牛肉、四季豆、口水雞、拍青瓜和川北粉皮，份量多到分咗兩個盒嚟裝，全部味道都好食，五香牛肉係牛𦟌，口水雞辣到適中，拍青瓜就帶點麻辣味道，我尤其推介佢嘅川北粉皮，因為真係好薄好滑。蜜汁豬扒擔擔麵折實價只係$21.2，試問呢個價錢喺邊度可以食到一碗麵，見有食評批評話塊豬扒係甜嘅，咁講明係蜜汁豬扒，其實帶甜都好正常啫，擔擔麵湯底濃度適中，有香濃嘅花生醬味，不過外賣啲湯係冇分開上，所以到食嘅時候啲麵就比較淋身咗啲，但味道嚟講絕對係OK嘅！麻醬雞絲冷麵折實價$22.8，唔好以為呢個價錢份量得好少，佢無論冷麵、雞絲同麻醬嘅份量都超多，食晒一盒超飽，不過可惜佢又好似有點餘溫，未至於係冷麵嘅感覺。不過都係果句，呢個價錢味道正常，我都係會俾一個好評！