大阪王將咖哩屋 (已結業)

難得今日出黎九龍灣接媽媽放工去食午餐, 星期六中午周圍都多人! 行過見到呢間大阪王將就入去試試。有室外同室內坐位, 被安排到一個卡位。卡位設計有啲奇怪, 張枱係幾高嘅, 好彩唔係生得矮, 唔係食得勁辛苦。呢個問題應該要改善下。坐低之後, 就送上綠茶同餐牌(唔記得影)。有lunch set, 有拉麵, 炒飯, 咖哩飯同定食。都有6-7款可以揀。價錢$50-60。 包1杯飲品(可以揀柚子茶, 薑茶, 蘋果茶或普通嘅熱檸茶/水等)。仲可以加錢叫餃子同轉飲品。辣肉碎雜菜叉燒拉麵唔係好辣, 而且肉碎食落甜甜啲都ok。麵唔淋, 正常硬度。有好多芽菜同幾片旬, 叉燒一片。正正常常嘅一碗麵。咖哩吉列蝦蛋包飯呢個蛋包飯(店舖稱為天津飯)係唔錯嘅,蛋好嫩口, 而且熱辣辣, 食嘅時候小心!!! 炸蝦都幾脆, 食得出係即整。個咖哩就有啲失望, 食落都幾似係即食咖哩嘅味。如果鍾意食蛋包飯嘅可以一試。飯量少, 男仔可能唔夠飽。跟餐仲叫左蘋果茶, 味道ok, 係有啲甜。