大利咖啡店

營業中

休息中

既然係臨別秋波, 師傅當然要搵下有邊幾間食店仲未試過啦, 而早一排行開呢度, 就索性入去食個晏仔; 要知呢度選擇又多, 行左個圈都係去間未試過嘅好, 於是就揀左呢間, 仲拿拿聲搵個位坐底先! 一坐底師傅即刻睇下有咩好食, 睇左一陣最後決定柯打一碟沙爹牛肉炒河, 餐飲就要凍檸茶啦! 落完單師傅再睇下個餐牌, 發現呢度到好多野食, 而且價錢唔貴, 都幾抵食咁喎! 過左一陣沙爹牛肉炒河就送到師傅面前, 即叫即炒, 賣相都幾吸引下, 不過睇真d個賣相似豉椒牛河多過似沙爹牛肉炒河; 再試下個味道, 沙爹味真係食唔出, 係有幾粒菠蘿喺度咁囉, 不過牛肉尚算鬆軟, 加上炒河炒得唔算油, 都可以啦; 而凍檸茶味道一般, 不過不失啦! 總括黎講食物質素可以, 環境一般, 服務就麻麻, 但價錢相宜, 廿八蚊碟炒河仲要連埋凍飲, 你話去邊到搵呀? 師傅覺得絕對抵食, 所以有機會師傅一定會再黎, 不過翻兜機會真係唔大, 皆因發現得太遲, 為時已晚了, 笑臉值得一比!