金牛火鍋飯店 (已結業)

新界人出得九龍城，基本一係泰國仔，二係牛肉餅，三就係打邊爐。而今晚就係最尾嘅 打邊爐。呢間幫襯過一次，今次已經翻新過，環境好咗，估計價錢都會貴咗。上次食海鮮鍋，但上次俾隔離枱個沙爹味深深吸引著，咁今次，就沙爹湯啦。牛肉，有本地同美國，我們當然叫本地牛。牛肉呢，有牛香，油香，無渣咁囉，無和牛咁無牛肉味，又無美國牛咁少油花，本人大膽咁講，絕對係非常出色嘅黃牛肉，而若果唔食牛肉，就千祈唔好黎。魷片，切得薄，爽脆爽彈。蝦丸拼墨丸，推介，好彈牙。花菜盒，推介，配合得好好囉。羊餃，好味。菜。烏冬，原本唔叫，但侍應姐姐話唔好浪費個沙爹湯，配烏冬最好，的而且確係無介紹錯嘅，完全吸晒尐沙爹味。以上所有，再加枝大啤，同三杯酸梅湯，要加一，兩人埋單太約七佰，貴就貴咗少少，但呢到有樣好，好多食品都可雙拼，若果無得雙拼，兩口子一定食剩好多好多，依家就食哂所有嘢，同埋，所有出品都係堅得，七佰，抵俾。