八一蕃巴蜀烤魚店 (砵蘭街) (已結業)

係屋企食得太多清淡飯，所以星期五放工就同朋友食番餐重口味，我就提議去食依間八一蕃巴蜀烤魚，主打四川味為主既烤魚。一坐底就同朋友叫左兩壺自家製既李乾蘋果茶同酸梅湯，酸梅湯相當開胃，甜酸恰到好處，非常易入口，而李乾蘋果茶就香香甜甜，蘋果香好重，仲感受到蘋果蓉係口入面，一樣十分開胃。首先叫左碟夫妻肺片小食，好爽口少少麻辣，仲叫多兩串白鱔同火雞腎，火雞腎唔會硬到咬唔到，而白鱔就好肥美，好香鱔味。本身諗住只係叫烤魚，點知見到有雞煲又心思思，最後兩樣都叫哂。雞煲香料調味非常好，雞肉好入味而肉質仲好滑，會食到唔停口。最後到主角巴蜀烤魽魚，第一次食魽魚，原來肉質好滑又少骨仲好大條，好適合唔鐘意食到太多魚骨既大家，個汁好惹味，好自然會食到停唔到口。因為覺得個湯汁好好味既關係，所以最後叫左小小配料作結尾，十分滿足。