人和月雞煲火鍋店 (已結業)

收工又去食火鍋放題，今次呢間都幾特別，有個好豐富嘅前菜俾你揀，可以揀雞煲、烤魚、酸菜魚。。。仲可以加錢揀啲特別啲嘅口味。我哋就揀咗椰青香茅檸檬烤魚，魚嘅份量有啲驚人，兩個人食，基本上食完就已經6成飽🤣魚要煮耐啲先入味，香茅味越煮越香。食完魚就可以揀湯底，好多選擇，我哋揀咗胡椒豬肚湯，好重胡椒味。我哋要咗最平嘅餐，已經好夠食，開頭會俾一份牛肉拼盤，可以試晒咁多種牛肉，最好味係嚴選牛下肩，大大塊肥瘦適中又有牛味。除咗牛肉，仲有好多其他嘢食，海鮮我哋主要食蝦，夠新鮮好彈牙。蝦滑同墨魚滑都好味。呢度仲有自製甜品，例如芋圓仙草凍或者豆腐花，好特別，一定要試。