十二味不只是烤魚 (已結業)

今日女朋友放工，接咗佢去食烤魚，之前喺雲南四川都食過，近幾年香港都好流行，所以就嚟呢度試吓啦。平日嘅六點鐘，店入邊都有成四圍枱，不過我就見佢哋食啲鍋物而唔係食烤魚，可能下午茶食烤魚太滯掛。店員姐姐係講普通話嘅，比我感覺好似好地道咁哈哈。菜單有一張大一張細，細嗰張就係俾你揀要邊一種魚要咩湯底。我哋揀咗最平嘅魭魚，要咗酸菜湯，仲叫咗幾個配菜。店員姐姐之後送咗兩杯水，係檸檬水， 感覺好清新，覺得佢個目的應該係俾人解辣既，都幾細心。條魚送到，三磅重都幾大㗎，兩個人一定要夠飽，個湯底幾入味，酸菜都好香， 最緊要係條魚好新鮮。唔會好似我哋喺四川嘅時候食過有啲草青味。我覺得師傅應該係調味嗰度有着手，因為類似嘅魚真係會好容易有草青味。配菜不過不失，我哋叫咗蘿蔔同生菜同木耳，不過大家都淨係掛住食條魚哈哈，下次真係想試吓佢另一條叫做江團魚。諗住遲啲帶屋企人成家過嚟食，就可以試埋佢啲鍋物。另外值得一讚嘅就係佢嘅冷氣好足夠，食呢啲烤魚好容易食到全身汗。