姚姚酸菜魚 (屯門市廣場2期) (已結業)

姚姚酸菜魚除咗有酸菜魚之外，原來仲有片皮鴨！兩樣經典名菜同時出現😀仲要兩樣都做得好出色！午市仲有一人套餐，絕對啱晒上班族。兩人份量嘅酸菜魚份量好多，三個人都夠食，小辣味道剛好😝辣椒放得耐成碟魚會更辣，熱辣辣成大盤放上枱，底部仲有蠟燭熱住咁就唔使驚凍晒。食落魚唔腥好滑，湯香濃而且酸菜好多送飯一流。半隻烤鴨嘅份量真係好多，夠3個人食。佢哋嘅片皮鴨唔算太肥，唔使擔心太多脂肪，鴨皮酥脆鴨肉肉質厚實，唔會太老帶油香。加上大蔥、青瓜，特製醬汁一齊食好好味😃呢個好抵食，家庭聚會就唔錯啦！烤鴨半隻，仲會送埋鴨架，係冷盤來做餐前小食就最啱，鴨架仲有少少肉，一路食一路傾偈閑聊就正！