唐人坊 (已結業)

Item: 唐人坊
Rating: 2
Author: 奧志雷

Tong Yan Fong

3.5

56 食評

味道

環境

服務

衛生

抵食

1531

紅磡

$50以下

港式泰國菜茶餐廳/冰室

奧志雷

等級4

2.1K

突然想食越式海南雞，行到老遠竟然執埋笠，十幾年舖都要說再見。兜兜轉轉最後都係出前一丁，索價 $47 蚊太貴喇麻！比我安安樂樂食碗麵唔得既，食個丁麵都要搞到我勁燥底，著晒火！神州大媽已經第二鑊點夠我去搭枱，個座位本身已經有人坐緊，勁尷尬！再次黑面話知您，我鍾意坐邊就坐邊！前面一個人埋單成堆人圍住仲乜春，阻夠住晒，我仲以為排長龍被幾個阿叔插隊打尖埋單先！

依間唐人坊極鍾意按排所有食客迫埋一齊坐，我都知要慳位要留檯，但您張枱勁那細勁那窄，坐定定伸長手臂已可以兜巴星對面位人兄！對角咖哩牛腩阿叔撩鼻屎，隔離椒鹽豬扒綣髮肥仔屍嗅腥蚶蚶，對家四眼叔強姦碟雞飯一嘴都係，那麼多奇珍異獸，困獸鬥﹗

早餐時段真心坐得超級舒服，渡假一樣鳥語花香，環境清靜悠閒，空氣流通氣氛祥和。早餐冷清清只得小貓三四隻，明顯出品比午市黃金時段質素高好多！餐牌寫明星期四福米就係褔米，嬸嬸有堅持不準轉福麵呢，有原則有責任心都係件好事既。而且其他湯底出前一丁麵已全部取消轉為合味道杯麵，真係有食客會專程坐係度食貴價杯麵嗎？依家只供應麻油原味或黑蒜油豬骨兩款。發現錯字，最緊要正字，捍衛繁體字，捍衛廣東話，菠蘿飽？食完就會飽？

為食早餐專登早十幾廿十分鐘出門口，早餐食客不多，幾十個座位只得小貓三四隻，環境寧靜及氣氛舒服，食得開心愉快！還以為除麻油原味及黑蒜油豬骨外，其他湯底已全部轉為合味道，再望真一點餐牌，還有其他湯底供應喎，手寫看不清楚啊！

熱奶茶，茶味清淡而奶味較強特出，免強夠熱未到燙嘴的感覺，不過不失入得口。熱檸茶走甜，燙燙的剛剛好飲到最舒服，濃茶撞澀澀的檸皮味，免免強強。凍檸樂，宿醉難當晏晝留留都要回魂曲！梗係要回魂曲提一提神解解酒，連戰多晚今晚休息回回氣。宿醉未清晨早已醒都不願出門口，磨到過晒鐘都照食個早晨先啦！辣椒油，少少咸少少辣多多油，連隊三大羮都沒怎麼動容。

網球拍雞髀，網球拍炸髀？仍然寫錯字，都話唔係脾臟唔係脾氣，係髀係肶呀！脆脆的雞皮甘香油甜，係粉多了一點點，白肉嫩滑多汁飛射，只是醃味不夠透徹，最深入的地方沒有味道，幸好完成度不錯，食得過。出前一丁，補充一下塑化劑先。何解要落蔥花？又唔係潮州粉麵。略為腍了一點點，而且一食便知係沖水攤腍再煮的質地，給點誠意生煮好嗎？潤志辣椒油，老闆識貨喎！夠香且辣醒神開胃。

招牌厚切豬扒，蔥油太過油滴滴十分膩滯，用鹽熟成不足，草腥味依然強烈。豬扒不覺怎樣厚切，厚度都是大路差不多。豬扒多肥膏，炸豬扒外層香口醃味略咸，唯有掉到豬骨湯洗乾淨再試，舒服很多。番茄萣皮作裝飾？相信不是用來吃吧！黑蒜油豬骨湯出前一丁，不是任何湯麵加蔥花就一定好食！麵質有點粉腍，幸好還有輕微的爽滑，食落便知係沖水攤腍，有訂單時再煮開。豬骨湯特濃黏黏，加上黑蒜油有點濁，最後都決定淋上大量辣椒油調一調整味道。

咖哩牛筋腩撈出前一丁，在 2011 年時曾經食過，膽粗粗再掉戰！油淋淋凍椰菜，到底點煮到架？咖哩汁濃厚香辣掛在無味丁麵還可以，牛腩鬆化無渣有咬口，牛筋是我喜歡的綿滑軟腍黏黏的。唔掛得要等成十分鐘，丁麵煮到腍劈劈濕濕粉粉，用筷子大力少少夾都斷，容易消化無牙都食到，要扣掉 1 粒星！出前一丁，忘記要走蔥，還要那麼多！唯有慢慢續粒挑走，同時可以讓白烚麵吸收一下湯汁，眼見湯粉依然沉底未有撈勻。生椰菜硬硬帶澀我不喜歡，再見吧！太陽蛋脆皮雞扒，連凍飲索價 $50 大元真的有點貴！

太陽蛋脆皮雞扒出前一丁，毫無脆皮感的所謂脆皮雞扒，油油黏黏的雞皮散發焦燶苦澀味道。雞肉肥美嫩滑滴汁優質只是醃味略重，用滾湯浸洗一下舒服很多。太陽蛋沒有煎感覺，外觀及口感似十足蒸焗出來的。白烚出前一丁要給多一點時間讓麵條吸收湯汁，那樣可以微微迫走滾水味道。濕潤不過腍的質地掛著甘甜黏滑蛋黃，大啖大啖地塞舒暢偷快。

香茅豬扒金寶車打芝士汁撈出前一丁，竟然連芝士撈都落蔥，到底有無真正思考過呢？此豬扒比起厚切豬扒、雞扒、雞髀較正常，煎豬微溫不油膩，香茅味微弱近乎零，味道只是普通豉油豬扒，鬆化不乾硬，煮理得宜。涼浸浸的出前一丁麵條淋上室溫芝士汁，原來此道菜是冷盤來的，我真的孤陋寡聞咯，失敬失敬。白烚丁麵撞著黏黏厚厚車打芝士汁，少少咸多多酸，當作開胃菜色也不錯。芝士汁份量只是剛剛足夠，給多一點點就不用我這麼狼狽。

出前一丁，丁麵會落蔥既茶記寥寥可數，黎幫襯經常都忘記要求走蔥。重手灑下大量蔥花，浪費我時間續粒續粒挑走，一大輪功夫後還未完結，還要親自將麵條翻騰十幾個圈，直至滾水、湯粉、麵條融合均勻，終於可以食用喇﹗就連出前一丁都煮得唔好，學咩人做日清主題餐廳呢？嬸嬸稱已取消辛辣麵，現只供應麻油味或黑蒜味出前一丁。

太陽蛋吉列豬扒，太陽蛋只有微弱溫度奄奄一息，沒有煎過的香口，只有油油感似蒸蛋似焗蛋，味道異常單調，整隻吞下處理掉。吉列豬扒極巨形，連隻碗都裝不下，本想照張全家幅的。薄薄的幼細麵包糠，完全沒有吉列的感覺，咬落要吉嘴吉脷，趙落要裂開索索聲才是正宗，當作普通撲粉炸豬扒吧！切得極厚身，比這裡的厚切煎豬扒還要更厚，醃味淡淡然沒怎麼味道，肉質略硬未算乾硬，感覺食緊有肉味有肉汁的法包。

太陽蛋吉列豬扒出前一丁，沖水攤腍再白烚的麵條，粉腍黏黏散發少許滾水味道，沒有滾熱辣即叫即煮的霸氣。陰沉地進食沒有靈魂的丁麵，沒有半滴鮮味，真的十分可悲，食到無心機，求其倒落肚埋單速逃。

炭燒豬頸肉日式燒汁撈出前一丁，等足廿分鐘！想快只可食雞飯。日清冷丁麵都係第一次，熱食應該幾好食。烚完個麵底攤到凍晒，照燒汁室溫，就算唔翻熱都叮下去呀！燒汁凍冰冰特別咸，椰菜油淋淋反晒光到底點烚架？微溫豬頸肉雖然醃味略為重手，不過肥美爽彈肉汁激射，而且不油不膩少少焦香，多多豬肉甜味，色香味都值得一讚，比雞髀雞扒豬扒更出色。

沙嗲牛肉黑蒜油豬骨湯出前一丁，即煮不得不讚無偷懶！豬骨湯汁十分厚實，還有甘香醒神黑蒜油點綴。滾熱辣黏黏的麵質，半爽半滑吸盡湯汁。火腿太陽蛋沙嗲牛肉黑蒜油豬骨湯出前一丁，沒有煎過的火腿，極鬆沙嗲牛，輕輕沙嗲淡淡甜味，讓麵條捲著吃，幸福的感覺浮現。

腸仔太陽蛋五香肉丁出前一丁雞蓉麵，地獄油咸腸不過炸得熱辣辣，如果炸耐一點，油溫再高一點，可以變得乾爽皮脆不會油淋淋就更美味。五香肉丁鬆軟綿綿不乾鞋，搭著辛辣味道蠻可口。滿有誠意的鮮煮出前一丁雞蓉麵，熱騰騰出晒煙掛著大量五香油捲埋肉丁大啖啜，刺激味濃燙著嘴仔份外滋味，湯汁雞味特濃，別有一翻風味。

雪菜肉絲福麵，所有湯麵都落蔥，再次忘記走蔥！食得太多辣椒，疴左成晚無點訓過，好暴燥！唔肚餓都要食野補足一下體力。下雨天明明早出門口，誰知火車開得比正常慢，人家預時間剛剛好嘆埋早餐準時上班，搞到食完早餐遲兩分鐘，扣錢蝕比公司。

火腿炒蛋，沒有煎過的室溫火腿，浸浸滾湯洗乾淨消消毒便直接兩塊同時塞到嘴仔去，咸咸的沒特別。炒滑蛋有誠意，暖暖香甜的，只是欠點鑊氣。火腿炒蛋雪菜肉絲福麵，靜靜的福麵不滾燙，幸好湯汁都夠熱，不過氣氛悶悶的。麵條擁著雪菜肉絲急急的不停吸啜，爽脆嚥韌加滑彈，咸甜交錯，開心滿意！

香妃雞湯即食麵，千里送條毛，大大條毛大媽都視若無睹，果然見慣大場面！三小件雞件，骨頭大大舊，骨多肉少，難以驅走的隔夜雞味，好壞參半！雞肉結實依然，非常的有咬口，麵條即煮鮮甜爽彈，就算大光麵都可以好好味！湯底特濃奶白，不孤寒不水汪汪，辣椒油都不用了。

太陽蛋風沙雞中翼出前一丁，餐牌明明寫住風沙喎，風沙在那？吹走晒？風沙雞中翼完全沒有半點鮮氣，翻炸不即炸，油淋淋立刻掉到湯洗洗，黏黏黐牙的炸粉，乾乾帶咸的白肉，陰沉的味道。即煎太陽蛋不是韌韌的焗蛋，蛋白滑嘟嘟。讓她慢慢吸收滾湯的溫度，微暖時將筷子插入中出，夾起夾起麵條拖著醇香甜美的蛋黃汁，無可抗拒不停連濃湯吸啜，滿分爆燈不得頂﹗

香茅豬扒番茄濃湯出前一丁，白烚丁麵腍劈劈只有滾水味無麵味，罐頭番茄湯微溫水汪汪，讓麵條浸一浸吸吸湯仍然無補於事。豬扒油淋淋掉落湯洗洗去才享用，暖暖地厚厚嚥韌，醃味清爽沒有半點香茅味道真有趣，不過好味道喎。

秘製醬汁雞扒菠蘿包，特色中式漢堡，用力壓壓少許扁身可以狠狠地大啖咬！雞扒碎上咬到左跌右跌好難搞，食不到肥美多汁感覺。生菜番茄都新鮮，秘製醬汁似沙律醬混豉油，略咸但醒胃，加上甜甜菠蘿包，咸甜反差有趣得意。

餐肉火腿太陽蛋雪菜肉絲米粉，期待兩個月既福米比您件大媽完全破壞，滿心歡喜終於有足夠時間老遠走黎享受美味福米，我本身真係勁憎食米粉，唯獨福米非常鍾意食！指住餐牌要福米仲要講兩次都錯，走蔥講兩次都係無走蔥，走包講兩次無錯有走包，加餐肉講三次無錯終於寫返落張單度，要熱奶茶就聽唔到要問多次，係咪唔識廣東話？乾硬的午餐肉，預先煎定都已放段頗長時間，浸浸湯讓她回暖一下。油浸火腿微溫沒有煎香，油滴滴反晒光，浸浸湯去油膩。

送到時都未有為意，拍完一輪照片後回魂過來，福米個樣怪怪的，用筷子夾起望真少少，飲啖湯開始火起﹗餐牌寫住福米黎喎，是否故意呃我架？忍不住問問收銀嬸嬸，原來落錯單，激死我﹗嬸嬸即時話收普通米粉價錢，根本唔係錢既問題，那幾蚊算罷啦﹗黑面冒煙，餐腿蛋求那其食晒，米粉食兩啖放棄埋單閃﹗最憎食米粉。