花園餐廳 (西洋菜南街)

營業中

休息中

已經有好多年冇嚟花園餐廳食lunch，好懷念佢哋嘅啫啫鐵板牛，下晝一點半嚟到都唔須要等位，不過餐廳都坐滿好多人。同朋友叫咗兩個午餐，與以往唔同，依家個午餐已經唔見咗個牛油餐包，比塊餅乾代替算數，以前見好多食客都冇食個餐包，真係好浪費，家下用餅乾代替屬於慳皮又環保。羅宋湯味夠濃郁，但係肉味略為淡薄，亦唔多見到有牛肉喺湯裏面，不過比好多餐廳好味。芝士焗肉醬意粉無芝士嘅香味，而肉醬意粉味道好淡，差啲唔知道自己原來食緊肉醬意粉，水準同微波爐雪藏意粉相似，焗豬扒飯就好有問題，啲飯似有輕微炒過，豬扒睇落吸引，但食落有怪味，可能係肉質變壞，我都試咗一小啖，連我都食唔落，所以我朋友只食咗啲飯，而豬扒就成碟放低，話俾個侍應知啲豬扒有怪味，佢成碟攞返入廚房，之後餐廳一啲反應都冇，亦冇任何sorry嘅表示，今時今日咁樣做食肆都得㗎咩？感覺非常失望。至於檸檬茶就重檸檬味，顏色靚可惜茶味淡薄。餐廳設於地牢，空氣及衛生通常都比較差，花園餐廳屬於舊式食肆，而且位處旺角舊區，所以清潔衛生整體算勉勉強強，洗手間就比較差啲，使用時就要忍受一下。