煌苑

營業中

休息中

今晚唔煮飯，出去石門食，選咗呢間，點知伏伏伏。去到攞枱，叫我哋去另外一邊，咁照去啦，係一個細廳，ok嘅，不過地毯都無嘅。疫情下無地毯可以仲好。但係啲枱就偏密。講返食物，我哋見佢哋好似推片皮鴨，就叫咗隻，另外仲有炒芥蘭，薑蔥蠔，上湯虎蝦伊麵底。蠔俾炸粉包到死實實，好厚，扮大隻。蒜蓉炒芥蘭無乜味，我當佢無落味精。重點嚟，虎蝦唔大，計埋頭，約一隻手掌左右，無乜味，上湯？唔係囉！蝦痴殼，仲唔爽唔彈，最慘係無挑蝦腸，黑色一條段開一段段都唔知點好。啲伊面一樣無乜味要叫攞辣椒油。再講埋個片鴨，一隻鴨片出嚟份量咁少，但又鬼咁大塊一件。一啲就大嚿肉，好似燒鴨斬件咁，一啲就得塊皮連住啲肥膏。跟兩籠皮，但又無蓋，係咁吹冷氣。鴨片有蝦片伴碟，但係奀嘅，唔知炸起咗幾耐。有啲位油淋淋，淋嘅。好，講服務，唔係話佢唔好，但係唔得囉。無水睇唔到，要叫。水唔夠熱。可能唔係主廳，攞碟辣椒油要好耐。埋單要好耐。有時叫侍應，佢應一應你，但又去咗第二枱。佢個廳本身好多落地鏡，但係就用啲白色膠貼貼咗一大半，相信係以防撞爆，搞到好核突。三個人食五六百蚊，唔係貴，但唔合格囉！