Kudos (已結業)

見到又有團購自助餐食，好似幾好咩都有啲，有蠔又有蟹，價錢還可以，即刻買嚟試吓。餐廳設計簡潔，都幾舒服，但我哋坐近廁所嘅側邊位。食物款式多，但海鮮唔好食，一心嚟食海鮮嘅我有啲失望。每位送10吋大虎蝦，今日嘅製法係黑魚子芒果莎莎，個汁好味但唔多見有黑魚子，蝦肉新鮮彈牙。太平洋生蠔，冇蠔味。海鮮吧有波士頓龍蝦，涷蝦，黑青口，太平洋螺，蟹腳，龍蝦仔，及法國麵包蟹。波士頓龍蝦無膏，肉質韌，比較好嘅係涷蝦，新鮮。麵包蟹，青口又係無味，無咩膏😯，螺係正常嘅。刺身款式唔少，少有嘅北寄貝及大大粒帶子。羊架及牛尾唔錯。鵝肝好味，充滿油香，燒牛肉麻麻。蒜茸粉絲蒸帶子及龍蝦鉗幾惹味。椒鹽軟殼蟹，大大件咁食，不過炸得有啲乾。即製法式海鮮湯有多款海鮮選擇，配上濃濃嘅湯底更加帶出海鮮鮮味。中式燉湯都幾多料，大大粒猴頭菇。甜品方面選擇唔算多，芒果拿破崙最好味，其他一般般。回本Movenpick雪糕。