樓下冰室 (已結業)

呢間冰室幾乎係我飯堂，唔只主打無味精瑞士雞腩脾同番茄湯粉好食，其他野都煮得比其他冰室更用心同好食。例牌我食開嘅招牌瑞士雞脾番茄螺絲粉，抵食有營。啖番茄湯係屋企煮再濃d嘅版本，瑞士汁調較得香甜，雞脾非常入味而肉質滑溜，呢間係我少有會食埋雞皮嘅餐廳。番茄粉上面仲放有滑蛋，香濃蛋味撈埋番茄湯係超正！呢度咖喱都好正，唔辣偏香同惹味。秘製咖哩牛腩飯牛腩份量多，飯餸分開裝，都靚仔。冰室有菜食係少見，而且上湯浸雜菇娃娃菜更少見。難得係都煮得好味，娃娃菜索哂d上湯，上湯湯底好鮮甜，唔洗講啦，好味。友人鍾意瑞士雞翼，同雞脾一樣好味，再入味d，佢連雞翼尖都食埋。餐加$9有凍檸茶，加$11有特飲華田脆爆添，即係凍阿華田上面加阿華田脆脆，咁杯凍飲就超濃華田味又有脆嘅口感，得意有好味。我就係鍾意呢度員工有禮貌，野又好食，價錢又一d都唔貴，希望水準一直保持下去呀。