好‧廚房 (已結業)

中意食拔絲同蕃薯既我，竟然俾我搵到間有蕃薯拔絲既餐廳，仲要係社企，幾吊腳都要去試下啦～!睇左食評，仲有個荔枝蕃茄頭盤，兩個都係必食囉!! 蕃薯拔絲細細粒，有10粒，脆口帶有芝麻甜味，正! 👍 荔枝蕃茄微酸帶荔枝汁既清甜，夏天食應該會有透心涼既感覺～ 💓2個人叫左2碟例牌既餸，咕嚕明蝦球同野菌浸菜苗，仲有個花膠湯～ 岩岩好食晒明蝦球都係脆口，帶酸甜送飯一流; 菜苗都唔錯，個湯又係另一個主角👑，真材實料，舊花膠彈牙架，入過廚房既人都知道，要真係識買料之人先㷛得出一㷛好湯，仲要時間、心機，$78真心覺得抵俾～💸💕平時出街食飯，一定會叫可樂既我(大家都知可樂要嚟做咩架啦：解味精!!)，今次唔使囉，反而因為食得太飽，飲多兩杯茶就得囉～ 可惜火龍果唔當做，未試到，下次要試埋，仲有個櫻花蝦炒飯同豬仔肶要試埋！😍(九龍區既社企餐廳，無幾多間閂成10點～)