魚蝦蟹 (已結業)

假日同朋友去左中環一間特色米線小店。主打魚蝦蟹等食材。有湯麵，米線，薯粉，撈麵同意大利粉多款選擇，梗有一款岩大家口味。重點係佢嘅湯底，無加任何味精，注重健康嘅朋友就岩哂。唔駛食完個麵鬼咁頸渴，係咁飲水。今次試左兩款米線套餐同一款小食。🦐秘製鮮濃蝦湯麵 $79+$22 (套餐）套餐包左兩款開胃前菜，炸物/炒菜，精選生果同罐裝盒裝飲品。湯麵煮得恰到好處，鮮蝦爽滑彈牙，湯底非常鮮甜，蝦味十足。如果想再濃味啲，餐廳仲提供左辣椒同蒜蓉，可以再帶出多一重嘅鮮味。我就冇加到蒜蓉，覺得就咁飲已經夠哂鮮甜，一滴不漏飲哂個湯底。配埋生果，真係覺得個人都健康咗。🐟胡椒魚湯米線 $61+$22 (套餐）魚肉相當嫩滑，魚湯清甜，帶鮮味同胡椒味。朋友都大讚，米線都非常彈牙。🦐吉列炸蝦 $22本來想食炸魷魚酥，可惜太受歡迎賣哂。依家好多餐廳都主打香辣酸辣麻辣，好少小店咁有heart 會做無味精嘅湯底。值得支持。餐廳仲唔收加一，好抵食。餐廳同PMQ 都好近，食完仲可以過去睇下展覽，真係假日嘅好選擇。