天丼 (已搬遷) 新店位置

成年冇去過日本旅行，一出街或者叫外賣都係想食日本嘢。平時行過Yoho見到呢間野好似幾正咁，今日第一次去試下叫外賣。近排因為疫情大部份餐廳外賣自取都有折頭，但係呢間基本上係原價，證明香港人對日本菜有幾大嘅情意結。食炸嘢叫外賣味道同賣相通常都會差左，所以都有啲心理準備。炸物同飯隔開放，避免左飯嘅水蒸氣令到天婦羅變淋，但係當然同堂食果種啱啱炸出嚟嘅香口係冇得比啦。（巨星天丼。$82）有炸蝦，紫菜，四季豆，魷魚，蟹柳，凡立貝，本菇，跟一隻溫泉蛋。算係比較豐富嘅一個選擇，除咗蟹柳本身自己有味，其他都算係比較淡口，蝦應該都算係天丼嘅靈魂，所以我覺得佢唔合格，粉厚，一舊舊咁，應該係因為已經尾水，啲炸粉已經好粘，蝦細隻無咩肉，食粉多過蝦。講真佢又唔會叫難食，但你收得80幾蚊一個飯，即係成1000円，就梗係要有返咁上下質素，你諗吓80幾蚊如果係食海南雞飯或者意粉，其實已經可以幾高質，如果佢只係求其將啲材料拎去炸，加個飯就收呢個價錢，持住（日本菜）三個字就變高檔，我覺得對唔住個海南雞飯。唔計因為外賣凍咗，如果呢個價錢堂食，都應該唔會有下次。