千樂燒味餐室 (已結業)

今次係第二次黎千樂，上一次同朋友路過見門面光猛，掛出黎嘅燒味又好吸引，試咗個二人套餐，一試上癮，今次單拖再去食坐低唔使諗就叫咗個一人叉燒燒鵝套餐，轉咗米粉，可以唔使咁飽。個餐黎到，嘩！又有鵝肶食，上次已經係咁，乜有咁多肶㗎咩一啖咬落去皮脆肉軟，係！個皮係脆嘅，好好食，減肥又可以放埋一邊啦！之後再試叉燒，半肥瘦仲有少少燶邊，啱晒我心意！而且⋯⋯ 份量使唔使咁多呀，疊到成坐山咁，下面唔係花生而係全部叉燒！好彩無食白飯啫 另外碟拍青瓜都唔可以忽視，好爽脆，個醬係自家調味嘅！今日例湯係青紅蘿蔔豬骨，我飲唔到有味精喎～ 所以最後我係清晒枱最後要講服務，姐姐好好笑容，落單同收錢都笑面迎人，放低個餐仲會講「你慢慢食呀」，真心讚！下次一定會再嚟！