Teru Teru Bōzu (已結業)

好耐無食過咁高質嘅日本菜啦！本來朋友俾咗兩間我㨂，但睇相已經覺得呢度好吸引。今次係第一次嚟，但相信我一定會再嚟！先嚟一個野菜沙律做前菜，摒棄咗傳統芝麻醬，換上特製醬汁，酸甜清新口感兼具有誠意，好有驚喜！再嚟一個茶碗蒸，裏面用料一啲都唔行貨，蒸蛋顏色帶少少啡色，相信係因為已作調味。連前菜都咁用心，好難得呀！我叫咗個刺身餐，由於個人比較麻煩，唔鐘意白身魚，特別先問咗員工今日刺身係乜。原先設定係拖羅。。帶子。。池魚。。左口魚，但兩款魚都唔係我飛佛，所以就膽粗粗問吓師傅可唔可以換。。就算係三文魚我都ok..師傅好爽快就答應幫我諗吓，然後嚟到時就變成咗海膽、帶子、拖羅、鯛魚同左邊另一款唔知係乜嘅魚。起初我都驚驚哋，之前食過呢類魚都好腥亦好重魚味，但嚟都就試下啦。。點知燒過嘅鯛魚好香，魚肉帶爽甜，右邊嘅就用咗檸檬汁調味，鮮甜又毫無魚腥。海膽同帶子更加唔洗講，拖羅嘅魚油香亦非常出色。朋友叫嘅籠仔鰻魚飯一打開已經超香，份量十足，鰻魚夠滑亦軟腍，連飯都充滿香氣。今餐完全係令心情走入晴朗嘅一餐呀。。而且只係百零蚊，有咁嘅水準真係好抵讚！