小欖燒烤樂園 (已結業)

連續幾日都話會三號波，一早約好班姊妹去燒烤樂，就算落雨又如何，反正有瓦遮頭無影響，一於出發！！Wow!對住個咁靚既無敵天與海黎BBQ，加上落下停下既雨點，真係好有feel~搵完個風景靚位，就去食物部拎餐具食物喇。我鍾意用燒烤網，一次可以燒烤多款食物，輕鬆方便。蜜糖係無限量供應架，除左餐具仲有埋廁紙提供，好貼心！我次次黎都會要埋包靚蜆，隨蜆附送錫紙蒜蓉同粗鹽，簡直係最佳配搭。頭盤緊係要腸仔同多款丸類啦，而家仲新供應埋魚餅同魚春卷，裡面有一粒粒既蔥粒馬蒂粒同冬菇粒，又香又爽口，加上本身魚餅既鮮甜，真係好美味！第一次燒豆卜，估唔到竟然唔會乾！！！燒完內裡仲充滿水份，加上豆卜索晒蜜糖，非常好食。必食介紹-烤多士仔，加$2有個自家制蒜蓉牛油，當塊多士烤到脆卜卜既時候，面頭既牛油已經熔化並滲入多士裡面喇，係咪聽到都流晒口水呢。豬扒雞扒金沙骨牛仔粒應有盡有，醃肉方面水準依然，入味得黎又唔會過濃過咸，最緊要係唔會口渴，所以我相信係冇加味精既。加多幾個粟米平衡下，就唔怕食得多肉會膩啦。今次d蜆都好靚，蜆肉都肥嘟嘟好飽滿，又夠鮮甜，最緊要無沙。可惜今日落雨，唔係就可以玩埋個暑假沙灘派對，價錢唔貴又多野玩。