貴花甜糖水甜品專門店 (已結業)

嚐辣後，突然甜胃急 call，就趁回程經過油麻地，去位於廟街附近的貴花甜試試。小店的人氣旺盛，未夠九點鐘已經坐滿了人，不得不讚侍應反應奇快，亦十分醒目，見我睇緊中式甜品的餐牌，就提議我試杏仁糊，仲話係招牌之一，可惜我早已心有所屬，同女友一人一個心太軟，唔使爭，獨食難肥嘛.．．．比利時朱古力心太軟即叫即焗，故需等二十分鐘，送來後輕輕將其剖開，見內裡的朱古力漿緩緩流出，狀甚對辦。先試一口蛋糕，質感較實，沒有期待的鬆脆效果，而朱古力漿味道尚算濃郁，但可惜卻唔太夠熱，而且調較得實在太杰，吃罷有種「章住喉嚨」的感覺。伴碟的是 Dreyer's 香草雪糕和一些生果球，前者大小正常，大牌子味道也有保証，只是溶得太快，令整個過程吃得相當頻能；後者鮮艷的顏色跟心太軟根本風馬牛不相及，而吃罷濃郁的心太軟後，這堆生果球更會變得毫無味道，簡直多此一舉。如此質素的心太軟，竟然敢賣 $42，完全係唔抵食！