芝士冰室 (已結業)

今日同老婆同埋個女出深水埗食tea，睇咗幾間，最後決定食芝士啦。 坐低睇完menu,我點咗個下午茶芝士雞扒撈麵，跟凍奶茶，老婆就叫咗芝士煙肉蛋焗通粉，餐飲upgrade 咗杯粒“粒粒爆檸水”，再加咗個芝士蒜蓉包。凍奶茶第一個到，口質薄身，無乜茶味，奶味亦都無乜。老婆杯粒粒爆檸原來係加大咁解，味道正常。芝士雞扒撈麵到，汁係橙色嘅，上面再有少少芝士粉，唔係拉絲嗰種芝士汁。麵正常，唔太淋或太硬，撈埋晒食都ok,整體唔油膩，不過個人覺得芝士味唔夠。雞扒係薄切，味道亦正常。老婆個通粉到埋，夠晒熱，焗溶咗嘅芝士有少少拉絲，份量足，而煙肉同蛋味道正常。整體味道同我個麵無乜分別。最後個芝士蒜蓉包到埋，都係同一款汁，夠熱，有蒜蓉味。總結係可以一試，味道尚可。