西貢金雞海南雞 (已結業)

同朋友到北角健威坊買健康產品，唔覺到十二点半，有啲肚餓，朋友睇見有間海南雞專門店，於是兩個人就入去醫肚。一坐低，店員就將兩碗湯送到我哋面前，個湯飲落好濃郁，大大舊紅蘿蔔喺碗度，都幾好飲，我想encore ，但店員話個湯要收十一蚊碗，於是我就無叫啦。睇個餐牌，推介海南雞，兩個人好自然叫佐兩個無骨海南雞飯。香港唔知幾時學咗星加坡，而家啲雞都興無骨居多，其實我鍾意食有骨落地嘅雞。好快兩個雞飯送上來，一早整定，連個飯都唔係熱首先，碟雞份量絕對夠食，賣相亦可以。睇落雞皮都幾肥，我無食雞皮嘅嗜好，何況睇見咁肥更加引唔起我興趣，雞肉部分嚡口啲，而且無乜雞味，可能雞脾會滑啲，但要加多十蚊。雞油飯裏面有些蒜片之類，但又係無蒜香，個飯頗硬。整體不過不失，唔難食但又唔係特別好食。呢處海南雞好普通，最好飲係個湯，$52(午餐)無跟飲品，唔算好抵食。