樂心冰室

營業中

休息中

今日7月23號係四姨媽生日，原本我們一早約好咗去食晚飯，但因一個掛咗好短時間嘅颱風就取消咗！喺下午嗰陣知道有個親友因身體不適入咗院做手術，所以喺夜晚嗰陣我們就去咗銅鑼灣嘅聖保祿醫院探望佢，之後我們就同其他親友一齊去咗渣甸坊嘅「樂心冰室」食晚飯！我們叫咗魚湯手打墨魚丸米線嘅墨魚丸都幾爽口彈牙，但墨魚嘅味道就唔係好濃郁，而米線嘅麵質就比較腍身，唔係好煙韌！公司湯通粉嘅材料有火腿、牛肉、叉燒同煎蛋，牛肉嘅肉質都幾鬆軟，但肉味就唔係好濃郁，叉燒嘅肉質就比較硬實，而通粉嘅質感好煙韌彈牙！至尊三寶湯通粉嘅三寶係魚腐、手打牛丸同手打墨魚丸，魚腐嘅質感一咬落就覺得好似食緊一「嚿」「發水麵包」咁，極之諗身，而且味道係淡而無味，而手打牛丸就好爽口彈牙，而牛肉味都算鮮味，唔會有好「騷」嘅味道！蕃茄牛肉濃湯意粉由於有好多新鮮蕃茄粒舖滿表面，所以賣相好色彩繽紛，牛肉嘅肉質亦好鬆軟同份量都幾多，而意粉嘅粉質都幾煙煙韌韌！跟餐有火腿煎蛋或火腿炒蛋，我們分別都有叫，煎蛋可以做到我們要求嘅太陽蛋效果，炒蛋炒得好滑溜，唔會炒到過熟！多士烘得都幾香脆，而且都幾大件厚身！