魚鈁 (汝州街) (已結業)

今次嚟到深水埗魚鈁，地點都算方便易搵，就正正喺西九龍中心對面。呢度最出名叫煲，兩個人就試試三樣嘢啦。第一樣，一定係必叫嘅，麻辣魚春魚卜煲，聽到都覺得好味，魚卜好新鮮，有咬口，大大舊。魚春應該煎香過，食落去鹹鹹香香，好惹味。雖然見到成煲嘢紅卜卜，但實際唔算好辣，香多於辣嘅。第二樣叫咗雞雜煲，內臟嘢真係好難唔好食，料頭爆香，再加上雞腎、雞膶，配上熱辣辣嘅煲，未食已經好香，唔錯。最後到鴨舌，味道唔算突出，不過勝在大大隻，送酒一流。環境方面，唔算好乾淨，地面同檯都油油地，可以接受嘅程度。