甜點

營業中

休息中

荃灣食飯， 本來諗住去熊貓酒店度，打邊爐食下點心，做個豐富嘅lunch，點知原來已經搬咗， 冇黎咁多年，真係咩都變曬， 唯有搵平食， 去咗對面商場 。我哋叫咗 卡邦尼煙肉忌廉意粉， 大大份好抵食 ，芝士又夠足料， 煙肉又多， 意粉煮得啱啱好完全唔會過琳，啱曬口味。 唯一真係要講嘅， 如果個汁可以再"傑"身一啲，就一流。再黎黑松露蘑菇意粉， 黑松露味唔算得出，但係勝在蘑菇夠多，一樣都係大大份，味道也不錯。飲品一人一杯青檸梳打， 有啲失望， 青檸味唔夠重， 半個青檸，篤到手都軟都唔夠味 ，好在夠凍。甜品方面叫咗金公主， 其實就係芒果西米露配燉蛋，新奇有趣估唔到咁好食。 最重要係唔算好甜。 如果知道金公主係芒果西米露， 就唔再亂叫多碗揚枝金露試下其他嘢。但楊枝甘露夠足料， 西柚帶點苦澀味， 如果係酸酸甜甜 味道更加美味。鹹甜兩樣都唔錯 ，估唔到荃灣都有其他好嘢食。