拿督星馬大飯店 (已結業)

如果search 觀塘美食 嘅話，相信唔少人都會聽過呢一間係碼頭熟食市場入面嘅星馬食物。佢俾好多名人推薦過，我自己都食過幾次。而當中最出名嘅係黑豉油撈麵。馳名怡保炆大細腳黑豉油乾撈麵 ($47)黑豉油撈麵色澤好靚，充滿油光，唔會話偷工減料，每一條麵都沾有黑豉油。份量都十分多，我同朋友都算大食嘅朋友，但我哋都食唔曬成個撈麵。 黑豉油撈麵好夠味，不過佢比較油身，間唔中食一次就ok啦。咁講返配料，我揀咗大細腳，即係豬腳同雞腳，佢嘅豬腳同雞腳都係非常非常正。因為佢炆到好入味，絕對唔會硬身，每一啖都係骨膠原嘅感覺，超正! 馬來福建豬頸肉蝦湯麵 (摻摻) ($51)蝦湯麵一上菜已經聞到陣陣蝦味，飲落去唔算太鹹，有蝦嘅鮮味。而且，蝦湯麵本身已經跟咗一塊叉燒、蛋、炆豬皮仲有豬油渣。炆豬皮炆到又冧又入味，豬油渣脆身香口，啱曬我鍾意食香口嘢嘅人。配上豬頸肉，豬頸肉燒得好香，有陣陣燒烤風味。摻摻係油麵加米粉。薑汁拉茶 (+$10)夠味，飲落去仲有薑蓉，但又唔會話太辣，天氣凍飲好暖身。