雅苑座

閒日夜晚同媽媽黎補祝母親節，幾星期前訂位，用左openrice 嘅coupon 有七折。六點半已經黎到，明明打去訂位嗰陣話要中間啲位，去到佢安排我坐側邊啲位，不過我講完佢都安排返靠中間可以望到上面啲酒店房嗰啲位比我。跟住佢派左張咭仔比我地拎一人一份嘅釀蟹蓋，個樣好唔錯，食落好一般，又鞋，又夾住啲蟹殼，食左幾啖已經唔想食。跟住去左拎啲海鮮食，拎左龍蝦同蝦，龍蝦其實冇味，諗住蝦會好啲，點知都係冇味。。。。對比返早一個月去灣仔Renaissance 食蒸龍蝦同蝦都比呢邊新鮮同好食好多。。。。跟住見到有蟹蓋，拎左個食，好多膏好好食，但食過一次成晚已經見唔返，得啲蟹腳。其他凍海鮮都冇拎黎食，望落都麻麻地。反而我覺得佢熟食好多款，羊架、煎三文魚同咖哩係最好食，咖哩仲有我最愛嘅胡椒餅，另外比較特別係鴨肝大阪燒，味道都唔錯，串燒反而失色，佢燒好晒擺喺度又凍晒，牛舌比較薄，味道普通。魚生望落都好一般，冇食。總括黎講，環境係好好，但凍海鮮就麻麻地，比起黎熟食好食好多，有啲失望，折左係幾平，但原價黎食應該唔會了。呢個價錢有更多更好嘅選擇。