影片
更多
2018-11-07
1566 瀏覽
講到識飲識食，其中一隻飯腳麵包班同學仔Ivan兄佢比我堅識食，仲識煮，所以，見有一家主打乾式熟成（Dry-Aged）牛扒嘅餐廳「Bellevue Bar & Grill」新開業，大家都非常有興趣一試，搵咗晚大家嘅老婆都各自有局，相約嚟「撐枱腳」，講吓飲飲食食、旅行嘢。餐廳位處油麻地「譽發廣場」23樓，離地鐵只喺一街之隔，交通非常方便。而餐廳兩面都喺落地大玻璃，對出都未有高樓遮擋，雖然只喺一般嘅樓景，但日頭嚟相信景觀開揚，就算晚上嚟，亦有種居高臨下嘅感覺。一出電梯時，餐廳門面喺大大張牆畫，畫有帶闊邊帽嘅淑女之外，旁邊仲有獅子山及香港高樓大廈嘅剪影，心想，內裡會唔會帶種俏皮嘅風格？但入到店內，都仲有幾幅同系列嘅牆畫，不過，一室幽暗嘅環境，配以精緻嘅水晶球吊燈，極富氣氛，亦睇得出晌裝修上花咗唔少功夫。此外，算喺餐廳嘅中間位，設計咗一個巨型酒吧位，加上特別光效，背後又陳列出一支又一支餐酒，喺幾搶眼。若非友人剛剛病好，否則，佢一定點番杯紅酒嚟襯番啲牛扒。但有少少可惜，晌呢處並未設有只供客人淺酌嘅吧位，或許，店主喺想客人就算嚟飲幾杯，都想佢哋坐晌餐椅上舒服啲。但講到啲餐椅，喂！真喺舒服喎，唔單單喺
餐廳位處油麻地「譽發廣場」23樓，離地鐵只喺一街之隔，交通非常方便。而餐廳兩面都喺落地大玻璃，對出都未有高樓遮擋，雖然只喺一般嘅樓景，但日頭嚟相信景觀開揚，就算晚上嚟，亦有種居高臨下嘅感覺。
一出電梯時，餐廳門面喺大大張牆畫，畫有帶闊邊帽嘅淑女之外，旁邊仲有獅子山及香港高樓大廈嘅剪影，心想，內裡會唔會帶種俏皮嘅風格？但入到店內，都仲有幾幅同系列嘅牆畫，不過，一室幽暗嘅環境，配以精緻嘅水晶球吊燈，極富氣氛，亦睇得出晌裝修上花咗唔少功夫。
此外，算喺餐廳嘅中間位，設計咗一個巨型酒吧位，加上特別光效，背後又陳列出一支又一支餐酒，喺幾搶眼。若非友人剛剛病好，否則，佢一定點番杯紅酒嚟襯番啲牛扒。但有少少可惜，晌呢處並未設有只供客人淺酌嘅吧位，或許，店主喺想客人就算嚟飲幾杯，都想佢哋坐晌餐椅上舒服啲。
但講到啲餐椅，喂！真喺舒服喎，唔單單喺皮椅嘅問題，配合餐枱嘅高度，兩邊嘅弧位及背脊嘅彎度，都讓人感覺好舒服。而餐枱雖一早擺好晒餐具，但落單後，侍應會因應你點嘅菜式而再調節所需餐具；仲有一點順帶一提，每換上新碟，餐碟上店家嘅名字都喺對準12點位，可見服務非常細緻，絕對喺素有訓練。
嚟得呢類地方都屬於高消費，一般都唔會供應普通清水，一支意大利Acqua Panna天然礦泉水，盛惠$45。
翻開餐牌，先有一版目錄，概括就會了解到有咩菜式種類，如乾式熟成牛肉、頭盤、沙律、湯、燒烤海鮮、家禽肉類、主菜、素菜及甜品。
既然主打喺乾式熟成牛肉，當然喺要重點介紹啦，所以，再翻開一版，就會簡單介紹吓咩喺乾式熟成，呢個做法嘅牛肉會變成點。
此外，餐廳更歡迎大家參觀佢哋放晌最入面嘅熟成櫃，每一條牛肉都會記低幾時開始熟成，一般而言，以30日左右為佳。一條西冷，晌熟成期間，往往切走唔少表面唔會食用嘅肉。
由於餐廳嘅燈光確喺較暗，所以，影出嚟嘅餐牌唔算好清楚，效果麻麻，希望多多包容，哈哈！
補充多點，其實餐廳有「精選晚市套餐」供應，而且，4道菜連餐前小食及餐飲，都喺$398 + 10%，睇起嚟性價比高，但可惜主菜只有一款限定。後來跟店方交流，原來因為剛開張，未敢提供太多選擇，但會逐步慢慢做，期望將來可以加添至三至四款主菜選擇，咁就較易吸引客人幫襯。
麵包籃配香草牛油餐前先嚟兩個小圓包，初時以為一樣，但再細心啲睇，一個應喺額外加入奧勒岡香草，食落有陣陣獨特香味。不過，講到驚喜，喺啲牛油，柔滑而富香草香。
扒黑椒吞拿魚伴希臘沙律 $168賣相精緻，而且色彩繽紛，希臘沙律嘅食材食落感覺好新鮮；不過，吞拿魚略嫌燒得略熟，再生一點更能夠突出其鮮味，此外，小弟個人就覺得黑椒味稍重，某程度冚咗少少魚鮮味，不妨改用黑椒拼黑白芝麻，減少黑椒嘅霸氣，效果或許會好啲。
龍蝦湯伴煙肉海鮮雲吞 $138淨喺睇到個湯色已經好對辦，一抹鮮橙紅色，入口極盡蝦鮮味，質感幼滑細緻，湯內更有唔少龍蝦肉；而煙肉海鮮雲吞亦出色，外皮脆而不膩，味道鹹香，可以講喺今晚無任何挑剔嘅一道菜式。題外話，從出湯及主菜，都睇到服務嘅細節，就喺同類嘅菜式，都會同步上枱，絕無你飲完晒個湯，先嚟我嘅湯，而且，上菜都會先後有序。
龍蝦湯伴煙肉海鮮雲吞
$138
17 瀏覽
0 讚好
0 留言
雞肉鮮菌清湯 $108「清湯」真喺要特別解釋一下，佢本身喺一道法國菜，將濃郁嘅湯底以蛋白黐走啲雜質而變清，所以，見到碟清湯清澈見底，就知首要嘅功夫已經做到足；而湯內混有嫩滑嘅雞丁及菌粒，只喺上枱時湯嘅熱度只有微暖，令味道大打折扣。
烤虎蝦伴香草醬天使麵 $198主食方面，先嚟一道天使麵，巨型嘅虎蝦成為呢道菜嘅亮點，賣相亦好夠立體。天使麵做得剛好，因為外間唔少餐廳做天使麵都過火，變得過腍，呢次嘅麵條就柔滑如髮絲，份量亦可不少；不過香草醬可以減少份量，令麵條不致太油膩，雖然都喺啲健康嘅橄欖油，但純感覺嘅問題而已。虎蝦雖然好有睇頭，不過，口感卻意外地未有預期般爽彈。
澳洲M5熟成和牛肉眼扒 $550是夜嘅主角卒之壓軸登場，餐廳嘅熟成牛扒有3款供應，包括美國安格斯嘅西冷及肉眼，以及更上一層樓嘅澳洲M5和牛肉眼，定價為每安士$45、$48及$55，Ivan兄都話呢個價都算抵食，因為佢不時都會買熟成牛返屋企煎，外間嘅零售價都相差無幾，晌度仲加埋配菜，以及招呼埋你。而無論邊款都好，份量都可以揀10、16、24安士。
個肉眼喺最期待嘅菜式，食得出件肉眼本身喺好高質素，熟成後令肉味更加濃郁，燒出來嘅外觀非常靚仔，外層帶點焦脆，似喺有種炭火香咁，不過，似乎稍微熟咗少少，但肉質仍然好腍滑，極富肉味，順帶一提，個燒汁調校得甚香濃；而配菜都好豐富，有薯蓉、車厘茄、露筍仔、燈籠椒及忌廉菠菜，薯蓉非常軟滑，其餘蔬菜都烤過嚟，有份香氣，忌廉菠菜入口好嫩滑，用料不賴。
焗迷你火焰雪山伴野莓焦糖燉蛋 $88一餐完滿嘅晚飯，以甜品作結喺常識吧，況且，小弟同Ivan兄素來都對甜品甚有研究，我哋真喺唔止識吹架，仲識整。呢道甜品就可以一次過試到兩款甜點，先講個法式焦糖燉蛋，焦糖部份做得薄脆且焦香，但燉蛋部份則稍嫌削身少許；而焗火焰雪山本身味道不俗，面層嘅蛋白好清甜，內裡嘅曲奇雪糕亦好軟滑。如能晌上枱時淋上少少白蘭地或冧酒再點火，營做出火焰效果就更有賣點。
整體而言，我哋都好滿意餐廳嘅環境及服務，環境令人感到很自在，座椅好舒服，侍應嘅服務也非常貼心，主動添水，更換餐具，殷勤態度，保持笑容，均是值得一讚嘅地方；但可能喺新開關係，在多方面都需要磨合，故仍有不少地方有改善空間，例如上菜嘅速度、部份菜式嘅熱度，都值得注意吓。事後有機會跟店主交流，感覺佢都好用心聆聽客人嘅意見，相信再磨合一般時間，再作出相應嘅調整，餐廳晌各方面會做得更出色。
張貼
