唔係漢堡 (已結業)

最近信德開咗間飯團店，食到我上癮，可惜係行得遠，家陣烈日當空，可以行少步就行少步啦，咁啱蘇杭街開咗間Not a Burger，賣韓式米漢堡，就睇下佢可唔可以一解我嘅cold turkey。店舖裝修簡單，冇枱，只要一張長枱幾張櫈對住街外，開放式門面，夏天响度立食真係咩都溶，相信佢哋都係主打外賣，就係咁我就買咗三個冇包嘅包做晚餐。見住佢哋整，其實就係白飯加入韓國紫菜，麻油撈好，入模擠壓成餅，加啲餡，再加另一塊米堡就攪掂啦。火腿米堡 $22 - 韓國午餐肉，泡菜，吞拿魚沙律。好味，泡菜同餐肉好夾，餐肉唔太鹹，夾埋吞拿魚沙律，濕濕哋，易入口。間唔鐘食到粒醃蘿蔔，有啲汁，清爽。加埋米堡嘅麻油紫菜香，好完滿。吞拿魚漢堡米堡 $28 - 同上面果個差唔多，不過餐肉變漢堡肉。漢堡肉有少許豬臊味，有泡菜中和所以問題不大，如果有埋醃蘿蔔就仲好。吞拿魚份量較少，總括係比餐肉米堡差。辣雞扒米堡 $28 - 餐牌上標示辣度係第五級，似乎我都低估咗，佢真係夠辣，不過唔會辣到食唔到。雞肉唔算乾，辣醬汁甜甜哋，幾惹味。其實食落係似飯團，不過佢餡多啲，大個啲，廿幾蚊個算係咁。男子漢食一個可能未必夠飽，我就覺得啱啱好。