金田家 (已結業)

天寒地凍，要食啲熱辣辣嘅嘢保暖先得！經過荃灣呢間拉麵店，裝修幾企理，感覺唔錯，於是就決定今晚喺度食飯！拉麵舖例牌選擇唔係好多，我地揀咗一個黑豚拉麵，一個柚子辛囗拉麵。朋友個黑豚拉麵最先上枱。拉麵麵質彈牙，湯頭唔會太油，之後加飯落去食完仲可以飲晒啲湯😋之後我個柚子拉麵好快都到咗！我𢳂起左一半辣醬，所以食落唔係好難。個湯真係有柚子味，幾好味，我都飲左一半個湯😝佢有兩種叉燒: 黑豚叉燒同腩肉叉燒，跟拉麵嘅係貴啲嘅黑豚叉燒，好大塊，比較瘦，好味啲👍🏻我哋追加左腩肉叉燒試下，比較肥，我哋覺得冇黑豚叉燒咁好味；另外仲追加咗溏心蛋同男爵薯餅。溏心蛋係味付嘅蛋，咸咸地好好味，一啖就食晒半隻！男爵薯餅係牛肉薯餅同紫薯甘栗薯餅，我好鍾意紫薯甘栗，甜甜地同埋咬到栗子粒，兩樣都無搶到對方嘅味！朋友就話牛肉薯餅都好食，好creamy又夠味。呢餐飯整體都幾滿意，下次想食拉麵可以再返嚟呢度。