太興 (已搬遷) 新店位置

次次黎太興都食燒味，今日lunch決定試試新野！我同同事不約而同都揀左個極邪惡嘅梅菜扣肉飯，連熱飲$58。餐廳幾乎爆滿，不過上菜算快，等左約10分鐘就有野食。就咁望落去飯同餸都好大碟，扣肉賣相唔錯，有成4塊肉咁多，不過夾起先知係薄薄薄切。扣肉炆得軟淋，吸收曬梅菜同醬油精華，肥瘦相間，皮同肥肉入口即融，唔錯！梅菜唔會太咸，帶少許甜味，送飯一流！另外提提，呢間太興嘅侍應姐姐服務都算殷勤，由到門口招呼到帶你入去搵位都照顧周到。餐廳空間大，卡位圓枱坐得頗舒適。