友利冰室x勿當奴 (已結業)

友利坊係街坊茶記小炒嘅格局，雖然地方有啲焗促，店員大大聲講嘢相當豪邁，但正正就係呢種庶民風情，令人感到相當親切。我超鍾意飲燉湯，又知道呢度嘅燒味自己燒製，頗為出名，於是就叫咗個燉湯餐，有湯有燒味，一次過滿足哂兩個願望🤗。首先端上枱嘅係燉湯，一打開盅蓋，只覺熱氣撲臉；用隻羹搞一搞，發覺湯渣佔咗成半碗😮，有猴頭菇，姬松茸菇，蟲草花，竹笙，茨實，蓮子，赤肉等，非常足料。熱湯入口，湯味雖然唔算好濃，但係啖啖菇味，好清甜，好好飲👍。燒味我揀咗叉燒燒肉雙拼，一上枱就已經覺得好靚仔：叉燒半肥瘦有光澤，仲有我最鍾意食嘅燶邊😍；燒肉又係半肥瘦，最正係層皮，睇見都覺脆卜卜。一啖入口，只覺兩者都係半肥瘦中偏肥，女士可能會驚肥，但係我就覺得好正，特別係燒肉，雖然唔可以講入口即溶，但係肉質軟腍有油脂香，加埋勁脆嘅燒肉皮，點埋黃芥末，真係食一嚿就停唔到口😋。一路食一路食，未夠八點，已聽見店員不斷嗌 ：XX 冇哂，XX 沽清，XX 賣哂，我相信唔少同路人好似我咁，見佢告急，就去撐，總之一個都不能少💪。不過話說回來，呢間店質素頗高，絕對係值得留低，唔是盲撐呢😌。