最掂燒味 (已結業)

呢度叫得做「最掂燒味」，未食已經知老闆對自己出品幾有信心！長沙灣店位置都幾方便，近元州商場果邊。先黎一份「皇牌最掂燒味三色拼盤」（$138）：自選三種燒味包括燒腩仔、懷舊腩叉同豉油雞。燒腩仔皮脆亦唔覺膩，腩叉就冇得頂，因為叉燒係要少少肥至好食，呢個腩叉燒得香之餘，仲一啲都唔覺佢肥呢！佛山燻蹄（$48）越來越少店舖有燻蹄供應，豬手皮帶爽，點少少酸酸辣辣嘅醬汁，超開胃！食燒味又點少得白飯（$10）同大大碗嘅上湯瀨粉（$15）呢？最後仲要讚下佢個自家製無味精素菜湯，味道清甜，仲有粒粒素菜有咬口呢！