千樂燒味餐室 (已結業)

收工約咗男友食飯，咁啱我哋經過千樂燒味望落都幾乾淨企理，同印象中感覺痴笠笠嘅燒味餐廳好唔同，見到入面嘅食客碟叉燒又幾靚，價錢又唔貴，即刻拉男友入去坐低先!餐牌入面有一人餐 / 二人餐 / 四人餐，當然另外仲有散叫啦$238二人餐就有一份燒味雙拼、海蜇雞絲(凍食)、滷水豬腳仔、蒜泥青瓜、例湯或飲品同埋兩碗白飯燒味方面我哋揀咗叉燒拼燒鵝🤤落完單好快就送上小食👍🏻滷水豬腳仔浸得幾入味，皮脆爽滑！蒜泥青瓜係將青瓜切丁粒，更加有咬口👍🏻蒜泥配合清新嘅青瓜一齊食真係好夾，根本無得輸🤤海蜇雞絲混合咗紅蘿蔔絲、青瓜絲同埋芝麻粒。份量都好多，完全唔似餐前小食嘅份量🤤海蜇屬於粗身個種，食海蜇如果唔夠凍嘅話會變得好怪，呢碟就夠哂凍! 一送上枱就瞬間被消失咗😆是日例湯就係合掌瓜煲豬展。合掌瓜同豬展都唔錯，煲到好淋，飲完唔會頸渴，證明真係無落味精喎! 👍🏻開完胃就食燒味啦 🤤燒鵝皮脆肉嫩，超好食！配上冰梅醬一齊食簡直係錦上添花！食得出燒鵝唔係隔夜貨翻熱，仲要份量幾足，重點仲要係俾咗燒鵝脾我食呀! 勁開心!叉燒就肥瘦適中，肉質好軟好鬆化，仲要暖暖地，麥芽糖亦上得剛剛好，仲要有少少燶邊，有少少甘香味，真係好耐無食過