日之食放題館 (已結業)

又係時候為自己打打氣，約個fd出黎食放題，見開飯食評唔錯，相又好吸引咁喎，黎試下先。食宵夜時段，升級價錢$173，有刺身、壽司、燒肉等，都幾抵喎。主打無火燒肉，枱上仲有鹽、七味粉等可以自己調味。飲品自助，有各式汽水，夏枯草，熱茶等。點左唔少野食，等緊燒肉熟之前，食住啲涼盤先。點左牛、豬、雞、海鮮、蔬菜等滿滿三盤，上菜速度快又無漏單，急不可待要燒燒燒啦。除左燒物，仲叫左天婦羅，炸粉唔厚又唔太油，幾好味。一邊食其他野一邊燒，意外地唔多粘爐喎，個爐好熱都燒得好快熟，唔錯。等食其間食下刺身同壽司先，升左級有多啲刺身揀，帶子新鮮又爽甜，三文魚肥美，啲刺身好厚切大大塊，唔使點太多件數。壽司飯有少少醋味，火灸好正。仲點左手卷，唔太大條，唔使驚食一條就飽。燒物方面，個人覺得牛仔骨，牛舌件好正，有肉味又易燒，豬頸肉夠肥美，三文魚翼魚油十足，燒起上黎又嫩又滑。除左肉，梗係要食返啲蔬菜，冬菇，雞脾菇燒起上黎鮮甜多汁，估唔到本菇一粒粒咁又燒得喎，仲好香菇味添，正呀正呀。唔漏單，上菜快，收碟又快，唔使怕堆滿枱，加埋一差唔多二百蚊位，食到飽到上心口，哈哈，開開心心吹吹水又過左一晚