茶墨 (已結業)

飲品鋪主打水墨風飲品，杯身會有隨意既紋路，好型格，而且打卡一流。除左可以揀番原配既牛奶，亦可轉豆乳添。另外鋪頭有賣蛋糕及雪糕，叫完飲品可以坐底慢慢嘆食物又得。仲有佢地大大力為香港加油打氣。叫左麻糬芋泥茉莉鮮奶綠($39)，紫薯鐵觀音沙冰($39)。飲品外型好靚，真係好似墨水咁隨意畫。杯身畫滿芋泥，底部見到超多麻糬，而且有大大舊芋泥，所以要攪勻好先飲。鮮奶綠既綠茶味濃郁，飲品唔會過甜。而且啖啖都係芋泥同麻糬，口感一流。麻糬好煙韌粉嫩，係會一啖接一啖咁飲。紫薯沙冰既味道較前一杯濃烈，好重紫薯味。而鐵觀音出奇地同紫薯好夾，兩者既味道都好突出，先係紫薯味，後勁就有茶香味。杯身用左紫薯畫水墨畫，而且亦係超足料，好似食緊紫薯cream既feel咁。雖然係叫沙冰，但冇出現飲到冰粒既情況，即係d冰已經打碎到勁碎勁碎，所以抵讚。飲品面有舊cream，攪勻後飲用更creamy。整體，成杯飲品由賣相到品嘗之後，都係讚口不絕，難怪咁多人買。而且飲完非常飽肚添，見到有其他顧客買另外2款既水墨風飲品，賣相更吸睛。係飲品鋪中，好值得飲既一間。