慶記 (已結業)

餐廳環境光亮，天花掛上好多燈籠，古色古香。而且空間感大，座位多，所以坐得舒服。主打上海菜式，有生煎包、排骨菜飯、冷麵，撈麵都有。叫左香酥排骨菜飯($48)，特色山葵醬青瓜冷麵($38)，醉雞卷(4件$16)，生煎胡椒包(2件$26)。菜飯加入左菜、菜乾(?)，鹹度適中，濕潤。飯量比正常多。香煎排骨已經切成4件，煎炸到變極深色。size唔算大塊，但肉好厚，所以啖啖肉。冷麵好有驚喜，海量青瓜絲鋪係面頭，可以多醬或少醬，仲有紫菜絲點綴。拌勻後，食第一啖個陣，feel到好冰涼，超級適合夏天食，消暑又清新。芥末味唔會好嗆鼻，係陣陣芥末清爽既感覺，麵條濕潤既，唔會覺得乾身。麵量仲非常多添，食唔哂。醉雞卷亦係冰凍，肉嫩雞皮爽，有陣陣酒香味。4大件屬厚身，抵食。生煎包即叫即煎，所以要等大約20mins。熱辣辣超好食，必叫。d肉汁不斷流出黎，真係要小心食，會熱親嘴。胡椒味濃郁，如果唔鍾意，可以叫番普通原味。包底煎完脆脆地添。整體，生煎包必試，好食到唔停口。而且其他食物既份量足，環境服務都好好，會encore。