澳瑪葡國菜 (已結業)

今日係父親節嘅正日，本來諗著一早預訂同爹哋去食自助餐或放題，但爹哋話唔係好想食嗰啲，想行到邊度先決定食咩餐，所以我們喺海港城一直行，行到去海運大廈嗰度爹哋話去上次食過覺得幾好嘅「澳瑪葡國菜」，所以我們就入咗去食晚餐！我們叫咗炭燒牛肋排一上碟嗰陣我們見到有三大塊牛肋排，真係份量十足，而且肉質好鬆軟嫩滑，肉味好濃郁，另外仲有一個小鐵盆盛載著啲炸得好香脆嘅薯條，真係幾抵食！葡國鷄嘅葡汁有好香濃嘅椰汁香味，而且仲有啲椰絲舖面，鷄肉嘅肉質相當軟滑，就算係鷄胸嘅肉質都唔會有「嚡」嘅感覺，而且仲有三隻鷄脾「添」，但有小小美中不足嘅就係其中兩件唔係好熟，有啲血水滲透出嚟，店員知道後即刻幫我們攞去整過，而且仲話萬分抱歉，態度相當良好，之後攞出嚟嘅賣相都絕對唔會「馬虎」，真係值得一讚！炭燒虎蝦伴蒜蓉香草汁嘅虎蝦肉質非常爽甜彈牙，而且好大隻，至於賣相方面師傅將虎蝦一隻一隻排得好整齊精緻，雖然虎蝦嘅表面燒得有啲黑，但食落唔會有苦澀嘅味道！西班牙黑毛豬春鷄飯有幾件嫩滑嘅春鷄舖面，而黑毛豬就切成粒裝撈埋入啲飯入面，食落令到口感更加豐富！