一口和味 (已結業)

見食評唔錯，於是特登走去食。可能太過貪心，叫咗個牛仔骨煎蛋飯加個炸雪糕不特止，仲整多個炸芝士年糕。牛仔骨飯個燒汁好好味，牛仔骨有成五六件咁多，味道唔錯，肥咗少少，但可以接受。雖然飯就少d同埋唔夠熱，但大胃王都應該夠飽。食食吓就嚟個炸芝士年糕，新鮮熱辣咬咗啖，d芝士溶哂，外面又薄又脆，都算香，但芝士味唔算濃，亦咬唔到一條芝士出嚟噃...食咗一粒後再食飯，淨番兩粒後來再食時已經無咁熱，外皮塌塌哋，亦都無乜芝士香lu。可能食到一半已經飽，開始覺得粒年糕有d「惡啃」，再嚟三粒炸雪糕時其實已經睇到都覺得「濟」，不過為食精神亦趁佢新鮮上枱時食咗一粒，發現就係好鬼油膩... 個皮唔同芝士年糕，用咗麵包糠包蛋糕炸，吸咗唔少油，裏面粒雪米糍太少雪糕，所以除咗好漏ge皮(仲有層雪米糍皮!) 之外，基本上食唔到其他味，覺得唔多好食。不過，可能只係因為自己太飽，一路食其實都有幾個客特登只叫炸雪糕食。最後，我都覺得間舖真係唔多環保，所有食具都即棄，我都知而家請人洗碗好難，但唔知係咪真係無空間改善呢?另外，牛仔骨無刀係食唔到ge... 尤其如果你想咬走d肥油...請問有無刀或者筷子啊?最後，間舖仔細細，得幾個坐位