魚樂一番 (已結業)

有一排冇食中菜，喺黃埔途經呢間以花膠麵為賣點嘅魚樂一番，決定一試。先上枱嘅係清潤解渴嘅自家製菊花茶，只係落咗好少糖，夠晒健康。店員唔洗我哋出聲已經體貼咁比碗仔我哋share鍋麵食。我比較鍾意濃味嘅嘅花膠牛魔王鍋麵。雖然話花膠比較貴，但燜得極入味極腍嘅牛腩同埋牛筋先係成碗麵嘅精粹。大大塊牛腩，加上入口即化嘅牛筋，水準拍得住牛腩麵店。湯底因為用花膠熬製而變得有少少漿口，而且飲得出用咗好多牛肉，牛味極濃。花膠嫩雞鍋麵湯底味道較清淡。首先聞到嘅係淡淡嘅花雕香，亦落咗紅棗一齊煲成。飲落主要係花膠同魚湯味。雞肉嫩滑量多，麵條為扁身嘅上海白麵條，幾嗦汁。餐廳嘅麵雖然價位較高，但湯底足料，堅持唔落味精，唔能夠同一般麵店比較。