滾起樓(粵點粵滋味)

營業中

休息中

之前睇好多社交平台page有介紹過滾起樓，但上半年又因為好多時疫情無晚市，所以一直未有機會入嚟試，到今日終於可以入嚟呢間被譽為翻版牛大人嘅火鍋店喇！喺門口睇原來朝早都有得飲早茶，下次入去行下山再試吓啦！由門口到入座成個感覺都好乾淨企理，空間感都大，坐低咗都覺得啲位幾舒服，唔會太逼夾，觀乎星期六晚都未算爆，成個場都係坐一半滿左右。叫咗個牛骨湯底，再scan QR Code落單，食物種類都算足夠，一般火鍋店有嗰啲都齊全，仲有啲台式小食。飲品都有唔同種類選擇，出面雪櫃仲有啲配菜可以拎。嘢食嚟得都快，但湯底略嫌未夠味，要食到後尾先慢慢出味，牛方面so far都好食，安格斯牛板腱最正，牛柏葉就切得唔係咁好，好難咬；台灣鯛魚真係必叫之選，非常鮮味嫩滑，鯇魚片同腩都可以，估唔到啲海鮮都算高質，蝦同沙白都好鮮甜，而啲台式小食水準都可以。最尾埋單食埋個雪糕就走人。今餐整體嚟講都尚算滿意，滾起樓由一入門去到落單、碗碟、醬料、飲品、配菜、台式小食都似足牛大人，整體都有八成，但收費就差唔多，似乎無乜點平到，但只計食物同環境已經好過好多酒樓火鍋，如果入開上水都可以再encore。