龍豐粉麵茶餐廳 (已結業)

今日下午我們喺粉嶺附近做完嘢之後，覺得有啲肚餓，所以我們喺周圍行吓睇吓有咩食？行到去聯和墟有間叫「龍豐粉麵茶餐廳」，當時係下午茶時間，店內嘅人客都算多，心諗食物出品應該都會唔錯，所以我們就入咗食下午茶！我們叫咗牛根牛丸粗麵嘅牛根燜得非常入味，質感相當煙韌軟滑，而且份量超多，而牛丸雖然祇得兩粒，但質感好爽口彈牙，而且牛肉味都幾鮮味，至於粗麵嘅麵質亦好爽滑煙韌！四寶米粉嘅魚蛋比較腍身，而且味道亦有啲腥，而魚片就係魚片頭，味道比較鹹，而魚皮餃嘅皮就非常厚身，食落嘅感覺亦有啲「粗嚡」，至於中間嘅餡料就超油膩，因一咬落去就成口都係油，真係極之油膩，豬肉丸就不過不失，至於墨魚丸就非常爽脆彈牙，而且有好鮮嘅墨魚味，係眾多款丸之中比較好！