CHI Tachinomi (屯門市廣場) (已結業)

喺屯門做完嘢，又夜又餓，同個同事見到間類似居酒屋嘅嘢，試吓都唔錯。好，坐低睇吓有咩好食先！牛肉飯，碗飯就唔太大，但係就好足料，成碗飯上面都係牛肉，牛肉炆得好入味同好冧，送飯幾好，眨吓眼就食晒碗飯。玉子燒，即叫即燒，咬落層次分明，食得出係蛋液逐層逐層燒，甜甜地咁，唔錯！日式炸雞，炸得幾酥脆，點醬油食就鹹鹹地，榨檸檬汁就幾清新，食落冇咁heavy。鹽燒牛舌，牛舌燒得啱啱好，唔會老，而且幾嫩，有微微嘅黑椒香味。芝士年糕，買飛佛，咬開係芝士流心，扯到絲，正！呢度啲下酒菜都唔錯，可惜我同同事都唔飲酒，所以最後就冇嗌酒飲。