老街 (已搬遷) 新店位置

近來香港好似多開了台式餐廳，比起以前一街都係韓國菜日本菜，依家選擇會多少少。今次同朋友仔試下新餐廳，其實都經過幾次，見到入面都裝修得唔錯，終於有時間可以約到黎食。餐廳裝修行懷舊台風路線，入到去又覺得幾得意，牆身有唔同的海報、貼畫，全部都以老台灣為主，的確有少少似去到台灣的感覺，就連餐牌都係懷舊台灣風，小細節做得相當唔錯。個人覺得最好味係滿漢大塊牛肉麵，原本都覺得有少少貴，但上菜之後就明白，成碗材料好多，大大件牛腩牛根，煮到入味又軟身，唔會覺得好鹹或太硬，個湯底就有少少蘿蔔的甜味，仲有少許香料味，另外個麵底都可以一讚，同係台灣食個種感覺幾乎一樣，入口綿中帶嚼勁，就算食到最後都唔會糊成一Pat。好多時酸菜只係配角，但呢間的酸菜好味到我會另外再點一份，入口爽脆不油膩，鹹酸調味適中，推薦！小菜方面較好味就有豬耳、豬腸及茄子：豬耳爽口卜卜脆，豬腸入味不油膩，茄子軟綿夠多汁，不錯。