利苑粉麵

營業中

休息中

住在這區都幾十年，一直都未試過這裡，今日在家工作，過了午飯時間才去搵食。在街口巧遇家母，佢又係未食飯，話不如來食牛什，所以就來了幫襯。聽佢講，呢度幾時都咁旺場多人，就今日所見，三點幾都差不多坐滿，幫襯的多是街坊，似乎所言非虛。家母要了牛什麵，我就貪心一點，想試埋牛腩，所以就叫了牛什牛腩撈粗麵。撈麵也是用碗而不用碟，牛腩及牛什舖滿碗面，好豐富同有睇頭。先吃牛什，最好吃是牛膀，炆得不太腍，保留牛膀獨有的質地，有咬口又好味，不錯；牛腸切成小段，亦夠肥美，牛肚及肺也不錯；牛腩要了爽腩，果然是做到了，還搭多兩舊牛筋。牛腩亦係炆得入味，邊位爽脆。總括而言，這裡的牛腩及牛什在這區算是不錯的了。腩汁香濃，但蓋不了鹹水味，似乎是過冷河時慳了功夫。家母的牛什麵亦料多不錯，她唯獨嫌牛膀炆得不夠腍。我話：「唔係喎！牛膀係要咁至有口感同保留佢獨有....」家母﹝不屑地﹞：「車！你識咩丫？快D食啦，米阻住人地做生意！」係係係，娘親永遠是對的。埋單四十蚊有找，都算物有所值，可以一試。