穌棧 (已結業)

工人尋晚冇煮我飯，所以今日出街食晏。後來經過船街嗰間Cafe y Taberna就入去試下。餐廳大概有不足二十個位，但12：15左右除咗一張被訂嘅枱外，其他枱全部滿座。午餐以set lunch為主，今日有海南雞飯、冬蔭功、泰式叉燒飯、青咖喱雞、豬手㷛同埋鮮蝦炒金邊粉。套餐包一杯泰式飲品或㗎啡、茶。價錢由$48至$58不等。我叫咗鮮蝦炒金邊粉同埋香茅特飲。等咗唔到十分鐘就上菜。份量唔算大，都有五、六隻中蝦，咬落好爽口。金邊粉亦炒得乾爽，唔會一pat pat；另外啲粉吸咗個醬汁，都幾好味。響香港唔係每間泰國餐廳都有香茅特飲。呢間都OK，但如果可以再濃啲同埋少甜就更好。因為唔係咩大餐廳，所以唔會expect有啲咩酒店級服務。但我比較欣賞呢間餐廳係就算佢係一間小餐廳，都唔會為咗做多輪生意就催你埋單。一般食客亦好識做，食完就走。今日餐飯盛惠$54。返到公司同同事提起呢餐飯，佢話海南雞飯同埋㗎啡（另加$6）係佢嘅至愛。如果有機會我會再幫襯，試下佢嘅海南雞飯。