紅磡冰室 (已結業)

中午的紅冰，依舊多人。雖然環境較為迫夾，但無阻我哋一齊食好西。豬扒撈公仔麵：超水準！瑞士汁公仔麵，al dante，有咬口但唔係爛溶溶嘅公仔麵，瑞士汁甜甜地，但唔會過咸，香味濃郁，好好味。豬扒好淋，但係唔係煎到乾晒果種，仲係有肉汁嘅，相當juicy，最緊要係無渣。總括嚟講，塊豬扒幾靚同埋火候啱啱好。炒蛋同埋蒜蓉多士：【由於太肚餓嘅關係，唔記得咗影相，so sorry !】炒蛋：好creamy，應該落咗唔少牛油炒，聞落好重奶油嘅味道，同埋食落好dense，有少少肥膩，但係好食嘅。蒜蓉多士：同坊間嘅茶餐廳唔同，呢度嘅蒜蓉多士係用上厚多士，大約有三塊方包嘅厚度。蒜蓉醬撈埋牛油一齊搽上塊面包上面，但係口味偏向大眾化，蒜蓉唔夠多，辣味不足，但尚可接受。唯一要批評嘅係多士烘得唔夠脆，失去多士應有嘅風味。跟餐包熱飲，我揀咗熱鴛鴦，咖啡同埋奶茶嘅比例合適，最緊要嘅係淡奶落得足夠，唔似某啲連鎖快餐店嘅鴛鴦一樣，為咗慳錢，喺奶茶咖啡鴛鴦等等嘅熱飲減少淡奶嘅份量，影響品質味道。但總括而言，$44蚊嘅午餐，喺紅磡區嚟講，係物有所值。