泰潮 (嘉咸街) (已結業)

今晚同朋友去左中環泰潮食晚餐，第一次食，原來深水埗店由2011-2018都有榮獲米芝蓮，中環呢間分店格局就有點似茶餐廳，中環夜晚食店一般都唔多人，所以我特別喜歡去中環晚飯。我地叫左個晚市2人套餐A $268，裡面包左好多野食，湯可以揀冬蔭功湯或扎肉肉碎湯、泰潮海南雞例牌、飯可以選雞油香飯或泰國絲苗白飯、小食有泰式炸魚餅拼春卷、咖喱可選泰式青咖喱豬頸肉或招牌咖喱蝦球、泰式蒜蓉炒雜菜、泰式甜品。我當然揀最愛的冬蔭功湯，係用煲上，特別有風味，裡面有好多配料，蝦、肉丸、蘑菇，唔算太辣，好好味，一人有2 碗啊。泰潮海南雞配雞油香飯，個飯份量好多，好香味一粒粒，不會太淋，配海南雞同咖喱都一流，海南雞都好多，滑滑的。招牌黃咖喱蝦球，平時通常都食咖喱雞或者牛腩，今次試下蝦球，好爽口，都唔錯耶，裡面仲三色椒同埋薯仔。泰式炸魚餅拼春卷，每人一舊魚餅同青卷，平時好怕魚餅好大陣香料味，呢個又無乜，好彈牙，春卷就好脆！泰式蒜蓉炒雜菜，呢個雜菜有芥蘭、蘿白、木耳同椰菜，款式好多，炒得不會太咸。最後甜品有個椰青糕，好清甜，有椰青香味，我最喜歡的泰式甜品之一。好滿足的一餐，平得黎又好味，物超所值。