黃記煌三汁燜鍋 (已結業)

老公話想打邊爐, 見到呢間燜鍋幾得意, 又可以鍋兩食, 見openrice咁多個笑評就去試下啦!當我想推門入去時, 見到好多簡體字, 有少少想縮沙, 不過就當時都8點半, 再諗真係好晏都未有得食, 我又已經餓, 所以入就入啦!我地被安排坐到卡位, 侍應好好咁走埋嚟介紹, 大概有十款燜鍋揀, 有魚, 海鮮, 雞, 牛, 豬, 素同自選…張相都幾大個鍋, 我諗兩個人食完都飽, 仲點一鍋兩食?老公鍾意食雞, 所以我地叫左三皇雞, 少麻辣, 另外仲有全雞比或雞翼鍋…等咗5分鐘左右, 侍應就拎咗三盒嘢嚟, 準備開鍋!佈好哂, 再燜咗成15分鐘先加汁, 佢地個秘制醬汁個質感好奇怪, 係杰得嚟點打都唔會斷開…好神奇!搞咗成25分鍾先有得食, 雞都幾滑但冇雞味, 不過唔知係咪佢抽起哂D雞比同雞翼去整另一個鍋, 個鍋係得D頭尾同雞胸, $246真係搵笨! 而個味道係甜甜辣辣, 同平時食開嗰D麻辣雞煲好唔同, 我地兩個都覺得個鍋貴得嚟唔值, 飽係飽, 不過食雞煲冇雞比同雞翼真係好嬲囉!另外紙仔餐牌係加火鍋料, 我地叫咗個皇帝菜同埋爆濃芝士丸個芝士丸真係不得不提, 第一次食到芝士丸係甜嘅!!!! 好難食!!