Burger Bar (已結業)

去蘭桂坊如果唔想飲酒都可以食下漢堡，呢間burger bar位置就喺蘭桂坊入口附近，佔盡地理優越位置。裏邊大部份都係高枱，我同朋友坐係個台上面感覺上似去咗高級酒吧，隔離就有一個廚師好開揚咁喺度整緊漢堡，見到佢好俾心機整緊菜式，成個廚房理應好大油煙，但係竟然油煙冇吹出來，抽風系統做得非常好。我哋每人叫咗一個漢堡，朋友本身想試個菇，我就食咗個牛肉扒，個漢堡真係好大仲大過隻手掌！總共有三層！漢堡裏面放咗兩隻大草菇，連埋芝士一齊煮，芝士被熱力融化變成芝士菇，芝士完美浸入菇身，真係好好味，成件事個質感好軟綿綿，暖入心。牛扒又係好Juicy而且好厚身，唔似平時出邊食到嘅漢堡扒牛肉係有texture，好豐富！裏面仲有番茄同生菜，可以平衡返營養價值，食材非常新鮮。另外仲叫咗啲小食襯托返個漢堡，全部都好大份，最鍾意食嘅係炸魷魚，啲魷魚唔會好痴牙，用嘅粉亦都唔多，唔會食到成口粉，係食到魷魚嘅鮮味！嘢飲方面我哋叫咗椰子水，同埋佢呢度獨特嘅茶，兩款都有解肥膩嘅作用，飲完之後成個人清新晒。